Во сабота групна крштевка во „Свети Никола“

Во сабота во храмот „Свети Никола“ за прв пат од постоење на кумановско-осоговската епархија ќе се одржи групно крштевање. Чинот кој е планирано да започне во 10 часот, е наменет за лица постари од 18 години. Од епархијата соопштија дека веќе се пријавиле 10-ина лица, кои сакаат да ја примат православната вера.

-Лицата кои ќе дојдат да бидат облечени во кратки маички и шорц за да можат да бидат крстени, помазани со елеј, па потоа и со миро. Да донесат по еден пешкир за да може откако ќе бидат оросени со вода да се избришат – изјави отец Ивица Трендевски.

Отецот наведе дека на овој начин кумановско-осоговската епархија им дава можност на сите лица кои претходно поради различни причини не биле во можност, да ја примат светата тајна-крштение и да станат членови на православната црква.

 -Сабајлево имавме бабичка од 80 години прашува за својот син кој е 55 годиште роден во такво време кога не можеле да завршат со крштевка. Потоа не можел, не сакал да се нафати и други сега некако успеале да го наговорат и да биде присутен на таа крштевка, односно додека е жив да го прими чинот на светото тајно-крштение-додаде тој.

Инаку минатата недела во црквата „Света Петка“ по втор пат се одржа групна венчавка. На тој начин пет сопружници од Куманово, бесплатно го крунисаа својот брак во црква.

 

Share and Enjoy !

0Shares
0 0

Коментари

коментар(и)