Колку лица се вработени преку Агенцијата за привремени вработувања во јавното претпријатие „Пазаришта“, колку вкупно вработени има, зошто доцнат платите, но и кога ќе бидат ставени во функција тоалетите на зелениот пазар беа дел од прашањата кои што советниците од опозицијата во советот ги упатија до директорот Илир Саити , на вчерашната седница.
-Ако се спореди првиот квартал во 2017-та и првиот квартал во 2018 –та година се гледа драстична разлика , петкратно зголемување на средствата потрошени за оваа намена, изјави Емилија Трајковска, советник .
-Што се случува со платите на вработените, за јули месец зеле плата во септември, каде е проблемот и што се случува со тоалетите на зелениот пазар , слушнав од закупците на тезги дека воопшто немаат тоалети во моментов, изјави Невена Величковска, советник
Саити информираше дека вкупниот број на редовно вработени во претпријатието се 49 лица и тројца вработени со договор преку Агенцијата за привремени вработувања, а дека извештајот за потрошените средства за репрезентација е во подготовка и за кратко време ќе и биде доставен на советничката Величковска.
-Што се однесува до првото прашање за вработените преку Агенцијата за привремени вработувања разликата е голема затоа што ние минатата година сме ги ангажирале кон крајот на март , десетте последни дена сме ангажирале тројца со договор преку агенцијата. Разликата во првото тромесечје на 2018-та тие беа ангажирани за една година. Минатата година кон крајот на месец март, значи само за десет дена се платени тие вработени, тројца. Вистина е дека платите за месец јули се земени во септември , имавме проблеми со наплата на плати и мислам дека со овој ритам на вработување во рамки на еден или два месеца ќе се стабилизираме и вработените редовно ќе примаат плата, изјави Илир Саити, директор на ЈП „Пазаришта“
Во врска со тоалетите на зелениот пазар, Саити рече дека во тек е реализација на проектот за меѓугранична соработка со што веќе е отпочнато реновирање на тоалетите , а во меѓувреме од страна на „Пазаришта “ поставени се привремени тоалети на паркингот на јавното претпријатие кои што клиентите ќе ги користат до завршување на реконструкцијата.
Советниците се интересираа и за причината за драстично зголемените приходи од добиточниот , но и од пазарот на кој што се продаваат половна стока.
-Ме интересира за дивите пазари кои што ги има на многу места во градот – дали нешто како јавно претпријатие преземате бидејќи дивите пазарџии не плаќаат за услуга кај вас, а да не зборуваме за не хигиената што останува по нив, изјави Драган Петковски, советник .
– Со колку броила располага претпријатието, зошто се користи електрична енергија бидејќи ако се троши само за тезги за осветлување , оваа сума е многу. Сметките за интернет се високи, за мобилните исто така се високи, изјави Анета Шандева Доневска, советник
-Има зголемување на приходи од добиточниот , но и т.н пазар Бувљак како резултат на зголемената соработка со другите институции, исто така и топлото време многу влијаше во подобрувањето на работата на пазарот за половна стока. Сметките за електрична енергија се високи зашто го осветлуваме зелениот пазар, регионалниот зелен пазар ,канцелариите , а на пазарот секоја тезга има своја електрична светилка , изјави Саити.
По расправата , советниците ги усвоија финансиските извештаи за работа на Пазаришта за периодот јануари- март 2018 –та и за периодот април – јуни годинава.
