За помалку од три месеци санкционирани се 46 пешаци во Куманово, информираат од Секторот за внатрешни работи. Преминувањето улица надвор од обележан пешачки премин е најчесто застапено во летните периоди. Кумановци се согласуваат дека граѓаните се несовести, а особено нагласуваат младите воопшто не минуваат на овие сообраќајни правила, па прават дополнителни проблеми за возачите.
-Не ги користат пешачките премини, ние постарите чекаме, поминуваме на пешачките премини-вели еден граѓанин.
-Поминуваат кој како сака, ниска свест, сите итаат некаде не може кога гледаме возила пред нас-дополнува кумановка.
-Има многу возила доколку не внимаваш можеш да настрадаш и затоа вообичаено ние повозрасните поминуваме на пешачки, но децата не знам-нагласува трет.
-Повеќето поминуваат вака пресечуваат среде улица. Не е безбедно возачите да бидат повеќе примерни, повнимателно да возат, а пешаците секакви има-посочи кумановец.
Пешаците кои не поминуваат на обележаното место се соочуваат со казна од 20 до 50 евра зависно од видот на прекршокот. Тие може да бидат повикани и на часови за сообраќај.
-Покрај овие санкции се преземаат и други мерки и поуки со кои се укажува на граѓаните како правилно да се движат на улиците, а притоа да се почитуваат сообраќајните знаци и прописи-вели Ивана Младеновска, портпарол на СВР Куманово.
Од СВР Куманово нагласуваат дека посебната мерка, сообраќајна поука се спроведува согласно мерките за заштита од ковид 19, во Центарот за култура.