Ракометарките на Куманово во второто коло од новата сезона во супер лигата славеа убедлива победа над Пелистер со 48-19, а средбата се одигра во салата на средното училиште Перо наков. Домашниот тим уште од самиот почеток се наметна како многу подобар противник и имаше висока предност во текот на првото полувреме кое на крајот успеа да го реши во своја корист со 22-7.
Во првите 30 минути од натпреварот сите ракометарки одиграа одлично во нападот и одбраната, а на голот блескаше засилувањето од Србија младата Катарина Живковиќ која нанижа 11 интервенции.
Во второто полувреме екипата на Куманово ја продолжи доминацијата и разликата постојано се зголемуваше, за да на крајот домаќинките ги освојат планираните бодови.
Во екипата на Куманово целата екипа фукционираше одлично, а најефикасна беше Трајковиќ со 10 голови, Јанкуловска запиша 7, Кипријановска 6 и Ивановска 5 голови. Голманот Живковиќ мечот го заврши со 14 одбрани.
Младинската репрезентативка од Србија Живковиќ истакна дека победата на нејзината екипа е заслужена и се надева дека Куманово во ваков стил ќе продолжи и на следните натпревари.
Помошник тренерот Александар Бојковски е задоволен од играта на екипата и смета дека сите ракметарки одлично ги извршиле поставените задачи на теренот.
Во третото коло екипата на Куманово во петок гостува на Чаир кој во дербито против Металург доживеа минимален пораз.
