Првпат годинава здружението на граѓани „Коледари“, чувари на традицијата со поддршка на свештенството на Кумановско- осоговската епархија организираа литија во чест на празникот Свети Никола, кој воедно е и заштитник на градот. Верниците тргнаа од Соборниот храм Свети Никола, ги поминаа централните градски улици и завршија пред платото на центарот за култура „Трајко Прокопиев“.
– Очекуваме голем одзив од граѓаните, се надеваме на поддршка од нашите граѓани да го прославиме овој ден и да се прошетаме низ улиците на Куманово. Основната цел е да го прославиме овој убав ден , Св.Никола е празник и на градот и на многу граѓани , треба да се прослави на еден убав начин и да се памети овој ден, изјави Марко Спасовски, секретар на ЗГ „Коледари“
Со своето учество во литијата, иницијативата за вакво одбележување на денешниот празник ја поддржа и градоначалникот Максим Димитриевски.
– За првпат дојде иницијатива до мене од страна на ЗГ„Коледари“ -, чувари на традицијата и од Кумановско -осоговската епархија со задоволство ја прифативме и секако денеска сме тука како граѓани да дадеме свој придонес на оваа организирана литија која што ќе се организира, ќе има дефиле во градот и секако во духот на православието и традиционалните норми да го одбележиме денот . На сите оние кои што го празнуваат Св.Никола како домашна слава им посакувам успех , здравје, просперитет и секако ги повикувам следната година да не има во уште поголем број бидејќи традицијата е нашето секојдневие и истата треба да биде негувана . Доколку ја изгубиме традицијата нема да можеме да креираме иднина која што ќе биде во склад на односите на взаемно почитување и секако помирување.
Членовите на „Коледари“ очекуваат наредната година да им се приклучат уште поголем број сограѓани во заедничкото одбележување на празникот Свети Никола, бидејќи планираат оваа активност да стане традиционална.