Поројните дождови кои изминативе денови го зафатија Куманово, предизвикаа излевање на реката Липковка, која ја поплави малата црква Света Петка во село Бедиње. Освен дворот целосно е поплавен и внатрешниот дел на ова свето место. Ктиторот, шеесет и седумгодишниот Ацо Величковски кој 12 години ја одржува оваа црква, истакна дека и минатата година врнежите предизвикале поплава, но тогаш водата не била во толкав интензитет.
-Водата по моја проценка некаде 80 сантиметри можеби и повеќе да има. Толку силна вода беше, дури и кај соседите во штала има удавено неколку свињи. Во црква има исто преку 80 сантиметри вода, иконите се уништени, столови, маси се е упропастено-наведе тој.
Величковски додава дека силната вода го прелила и мостот, кој што делумно е уништен. Тој се надева дека Општината ќе го реновира мостот и дека и во иднина преку него ќе можат да поминуваат автомобили, бидејќи тврди дека во црквата доаѓаат болни лица кои не можат да пешачат. Инаку за поплавата ги информирал и надлежните, па деновите треба да поднесе пријава за проценка на штета.
-Има свети води на Света Петка, Богородица и Света Недела, загадени се сега моментално не можеме на никој да му помогнеме не смеам да давам од тие води, затоа што ќе затруеме некого. Сега ќе мора да дојде и пожарна да ги исцрпеме водите, исчистиме, дезинфекција да се изврши и дури тогаш да им давам на луѓето-нагласи тој.
Црквата Света Петка во село Бедиње постои повеќе од 50 години.
