Сашо Стошевски вчера е назначен за нов директор на Општа болница Куманово.
Стошевски е магистер на економски науки, а повеќе од 15 години е вработен во подрачното одделение на Фондот за здравствено осигурување во Куманово, каде што од минатата година ја извршуваше функцијата раководител.
На функцијата директор на Општа болница Куманово доаѓа откако завчера, министерот за здравство Арбен Таравари на градскиот плоштад во Куманово пред медиумите соопшти дека веќе го разрешил д-р Стефан Трајановски.
Одлуката за разрешување на д-р Трајановски, како што рече Таравари, е поради постоење индиции за лекарска грешка во случајот со 32-годишниот кумановец кој ненадејно почина во установата на 17 март годинава.
Стошевски е потпретседател на Општинскиот комитет на ВМРО- ДПМНЕ, а беше и советник во Советот на Општина Куманово во претходниот состав.