Основното училиште „Кочо Рацин“ неделава е домаќин на проект од програмата на Еразмус+ насловен „ Откриј го светот околу себе со новите технологии“. Во проектот вклучени се училишта од шест држави, покрај Македонија, училишта од Полска, Италија, Романија, Бугарија и Грција. Како што информираат координаторите, преку активности секое партнер-училиште треба да презентира модерен начин на предавање, унапредување на наставата, користење на напредна технологија, употреба на нагледни средства, користење на различни игри и квизови во наставата, интерактивна настава, работа во тимови, заедничко учење меѓу учениците.
-Проектот е со цел унапредување на наставата, користење на напредна технологија, иновативни, креативни методи, техники на поучување и користење на 3Д принтер кој што е нешто сосема ново, но од друга страна исклучително важно и интересно за учениците и збогатување на наставата. Конкретно за активноста тука во нашето училиште, имаме тема „Математика“ и по тој повод тимот од проектот на Еразмус + програмата од ова училиште подготви лекции односно активности поврзани со математика, како и активности поврзани со употреба на 3Д принтерот, со информатика и сл. изјави Сашка Стаменковска, локален координатор на проектот
Ова е трета мобилност во рамките на проектот. Претходните две се реализирани во ноември 2021-та година во Полска, главниот кооринатор и во мај месец годинава во Романија.
-Проектот требаше да заврши на 31 август 2022 година, но поради пандемијата сите проекти кои што се работат низ Европа се продолжени на една година и ќе заврши на 31 август 2023 година. До тогаш остануваат уште три мобилности, односно активности, но и помеѓу мобилностите имаме одредени активности кои што ги работиме или индивидуално во училиштата или заеднички преку состаноци. Најважната работа од овој проект е што по завршувањето на проектот ние сакаме да остане нешто како вредност со долгорочно влијание и позитивен ефект на сите училишта вклучени во проектот. Во однос на сличностите и разликите меѓу училиштата можам да кажам дека сите партнер -училишта имаат добра опрема, смарт табли, лап топ компјутери, се одвива интерактивна настава, а во однос на проектот и импресиите – задоволни сме од активностите, од искуството, од учењето на учениците, изјави Силвиа Циран, координатор од Полска
-Се заблагодарувам за досегашните активности подготвени од еразмус тимот од Куманово. Куманово е убав град со прекрасни луѓе. Вчера го посетивме кањонот Матка, главниот град Скопје, а за утре е предвидено патување до Охрид, запознавање со македонската култура и традиција преку посета на манастири, амфитеатарот, Самуиловата трврдина и панорамски разгледување на Охрид, изјави Томаш Шчагловски, директор на училиште од Полска
Следната активност ќе се реализира во ноември годинава во Италија, по што ќе останат уште две мобилности до завршување на проектот, во март месец 2023-та година во Бугарија и последната активност во мај месец 2023-та во Грција.