Од следната недела се очекува да започне вакцинацијата против сезонски грип. Од Центарот за јавно здравје Куманово потсетуваат дека вакцината е бесплатна за ризичните групи на граѓани, но претходно треба да се пријават за вакцинација. За граѓаните на кумановскиот регион нарачани се 2.500 вакцини против сезонски грип и 200 комерцијални.
„Најправилно е пациентите самостојно да се пријават за вакцинација, преку страницата vakcinacija.mk – пријава за вакцинација за сезонски грип 2024, изјави д-р Јадранка Стаменковска, епидемиолог од Центар за јавно здравје Куманово.
Пријавувањето за бесплатна вакцинација против сезонски грип за ризични групи население започна на десетти октомври, информираше министерството за здравство. Набавени се 70.000 дози четиритипна вакцина против сезонски грип.
Со бесплатна вакцинација се опфатени следните ризични групи: повозрасни лица (над 65 години), лица со хронични заболувања, здравствени работници, бремени жени, деца на возраст од 6 месеци до 5 години, како и лица сместени во установи за социјална заштита на стари лица и вработените во установи за социјална заштита на стари лица.
Надлежните потсетуваат дека вакцинацијата против сезонски грип е најефикасна мерка за превенција, која спречува појава на потешки форми на грип, компликации и смртен исход особено кај ризичните групи.
