Кумановци ќе имаат можност во вторник и среда (24-ти и 25-ти октомври) во Занаетчискиот дом од 19 часот да ја проследат промоцијата на најновиот краток филм „Трговија“, снимен со екипа актери, волонтери на општинската организација на Црвен крст Куманово, а во режија на Марко Јовановски.
Пред промоцијата, креаторите ја објавија оваа ексклузивна сцена, со која се доловува интензивната атмосфера на филмот.
-Во оваа сцена, ќе ја доживеете итноста, неизвесноста и неочекуваните пресврти што го даваат тонот на целиот филм. Тоа е убедлива снимка од почетокот на приказната и веруваме дека ќе го подигне интересот на публика. „ТРГОВИЈА“ ги истражува темите на издржливоста, семејството и човечкиот дух, а ние сме желни да ја споделиме оваа сцена како најава за она што следува. Оваа возбудлива сцена нуди примамлив поглед во светот на неизвесност, итност и неочекувани пресврти. Погледнете го впечатливиот почеток на приказна која ги истражува темите на издржливоста, семејството и нераскинливиот човечки дух, информираат креаторите на филмот.
Во филмот играат Анастасија Милошевска, Надица Трајковска, Николај Павловски, Марија Петровска, Кристијан Петковски, Марио Стефановски. Звукот е на Марко Пешиќ, музика Никола Наумовски, монтажа Марко Јовановски, продуцент Никол Ѓорѓевска, извршен продуцент Александар Крстевски, директор на фотографија Милан Богдановски.
