По денешната средба на Сојузот на синдикати на Македонија со претставници од Владата, дијалогот продолжува в среда, за кога е закажан Економско-социјален совет, каде на трипартитно ниво помеѓу Владата, работниците и работодавачите ќе се одлучува за барањата на синдикатот за зголемувањето на минималната плата, а како што велат од ССМ тоа е „единствената светла точка од денешната владина средба“.
Претседателот на ССМ ги повика работниците на штрајк, протести и блокади на улиците доколку во среда не бидат исполнети нивните барања за зголемување на минималната плата на 18 000 денари, зголемување на останатите плати и враќање на регресот за годишен одмор познат како К-15 во јавниот сектор.
