Претседателот на Синдикатот на работниците од управата, правосудните органи и здруженијата на граѓани (УПОЗ) Трпе Деаноски денеска одржа прес-конференција пред зградата на Основен суд Куманово.
„ Со оваа прес-конференција не сакаме да го рушиме угледот на Основен суд Куманово. Оваа прес-конференција е за спас на судот и за спас на вработените во судот.
Бараме надлежните, односно Судскиот совет веднаш да постапи по претставките на вработените и да ги штити нив, а не претседателите и судиите кои го штетат угледот на судството во државата.
Ја повикувам претседателката веднаш да престане со психичко и физичко малтретирање на вработените и да поднесе оставка.
Го повикувам Судскиот совет сериозно да си ја сфати работата и да ги испита сите наводи од поднесената претставка, да ги заштити вработените од самоволието на претседателката и да поднесе постапка за разрешување на претседателот на Основен суд Куманово согласно предвидените членови во Законот за судови.
Доколку истото не се стори во најбрз можен рок, сите колеги што се позади мене се спремни да почнат протести, а не само протести, спремни сме да го затвориме судот со штрајк“, кажа Трпе Деаноски претседател на Синдикат на УПОЗ.
