Премиерно изведена претставата „Смрт и девојка“ на Театар Куманово

Претставата, „Смрт и девојка“ во режија на Мирослав Петковиќ, актерите од Театар Куманово премиерно ја изведоа викендов во малата сала на Центарот за култура. Станува збор за претстава која е реализирана со сопствени средства на институцијата, а во неа играат Сања Русеска, Марко Трајковиќ и Владо Дојчиноски.

Драмата „Смрт и девојка“ од аргентинскиот писател Ариел Дорфман, е инспирирана од диктаторскиот режим на Пиноче во Чиле, во периодот од 1973 до 1990 година, а ќе отвори многу прашања поврзани со правдината, траумата, осветата, довербата, поддршката, простувањето, помирувањето и ефикасноста на општествените системи праведно да управуваат со своите тешки, но многу важни прашања.

Дејството во драмата се случува по падот на диктатурата во неименувана јужноамериканска земја, што ѝ дава универзалност на темата, при што фокусот е ставен на последиците од политичкото насилство врз поединците, а особено над жените.

Една случајна средба ќе иницира конфронтација помеѓу минатото и сегашноста, ќе оживее најдлабоки стравови и гнев, поврзани со едно киднапирање и мачење за време на диктатурата.

Драмата остава силен впечаток поради неизвесноста што го принудува гледачот да размислува за моралните дилеми, личната ангажираност и учество во општествените текови, особено ако се неизмерно тешки, но и поради својата актуелност, која за жал никако не поминува.

Сашо Костовски е драматург на претставата, костимографијата е на Дарко Илиевски, Мишо Димитријевски е задолжен за видеодизајн, инсталацијата е дело на Крсто Богојевски, а за дизајн на плакатот беа задолежни Игор Спасовски и Мишо Димитријевски.