ВИДЕО: Спасовски во посета на СВР Куманово, задоволен од резултатите

Министерот за внатрешни работи, Оливер Спасовски одржа работна средба со раководствата на Секторот за внатрешни работи Куманово и Регионалниот центар Север, со цел согледување на сработеното како и лично запознавање со реализираните активности во 2022 година и постигнатите резултати. На средбата министерот Спасовски беше информиран за безбедносната состојба на подрачјата на СВР Куманово и Регионалниот центар Север, состојбите со криминалитетот, како и активностите кои се преземаат, во насока на намалување на стапката на криминалитет, одржување на поволен јавен ред и мир, безбеден патен сообраќај и превенција, со единствена цел – подигнување на безбедноста и заштита на граѓаните. Министерот напомена дека на територијата на СВР Куманово во периодот јануари – ноември 2022 година, споредбено со истиот период во 2021 година, вкупниот број на кривични дела бележи намалување за 13.3 %.

„Во истиот период во однос на активностите насочени кон спречување и откривање на недозволена трговија со дрога и оружје, СВР Куманово бележи зголемување во откривачкиот дел за 21.7 %. Позитивниот тренд во 11-те месеци годинава присутен е и во областа на безбедноста во сообраќајот. Само во месец ноември 2022 година споредбено со ноември 2021 бележиме намалување на вкупниот број на сообраќајни несреќи за 34,8%“, истакна Спасовски. За територијата која е во надлежност на Регионалниот центар Север Спасовски потсети дека во периодот јануари – ноември во 2022 година споредбено со истиот период минатата година постигнато зголемување во откривачката дејност на фалсификувани возила за 400%-дополни тој.

Во делот на откривање на илегалната миграција, Спасовски рече дека годинава е забележано зголемување за 8,5 % на бројот на откриените илегални преминувања споредбено со 2021 година. За 15% е зголемен и бројот на откриени случаи на криумчарење мигранти.

„Што се однесува за бесправна сеча и пустошење на шуми годинава имаме тренд на зголемување на откриената дрвна маса за 11%“, истакна министерот додавајќи дека во периодот јануари – ноември 2022 година споредбено со истиот период во 2021 година се бележи тренд на зголемување на откриените случаи на прекуграничен криминал за 22,2 %-истакна Спасовски.

Потенцираше и дека безбедносната состојба во надлежност на СВР Куманово и регионалниот центар Север е поволна и на задоволително ниво. Тој изрази уверување дека и во наредниот период ќе се продолжи со зголемена динамика при реализација на превентивните активности, но и на репресивните мерки, па со добри резултати во поглед на ефикасноста ќе ја испрати тековната година.