Вонредна крводарителска акција се одржа денеска во Центарот за Култура Трајко Прокопиев. Организатори на акцијата се општинската организација на Црвениот крст и Институтот за трансфузиона медицина.
-Кумановци се доста хумани, даруваат доволно крв, до сега имаме соберено 24 крвни единици, се надевам дека уште ќе даруваат-изјави Бисера Ѓошевска волонтер во Црвен крст Куманово.
Ова е втора вонредна крводарителска акција која се одржува во летниот период.
-Крводарителите доаѓаат првин кај нас, им го проверуваме притисокот, хемоглобинот во крвата и според тоа ги одредуваме другите параметри, се потполнува прашалник и проверуваме дали се во ред за дарување. До 12 часот имаме голем одзив, очекуваме да биде уште поголем-истакна трансфузиолог Јасмина Трајкова од Институт за трансфузиона медицина Скопје.
Крводарителите истакнаа дека секогаш со задоволство учествуваат во ваквите хуманите акции.
– Три пати дарувам крв, заради хуманост но и за сопственото здравје. Планирам да продолжам и во иднина-истакна крводарителот, Стефан Стојановски.
Крводарителската акција започна во 9 а траеше до 15 часот.
