Во текот на четвртата недела од 2026 година (19.01-25.01.2026), во Македонија се пријавени 1.708 (I=93,0/100.000) случаи на групни пријави за заболени од грип/заболувања слични на грип, од нив 102 заболени лица се евидентирани во Куманово. Највисока инциденца (189,6/100.000) се регистрира кај децата на возраст од 0-4 години.
Општите мерки за заштита од грип се насочени кон сите акутни респираторни заболувања и може да се од голема корист, особено ако се применуваат во текот на целиот зимски период:
– да се избегнува собирање и престој во простории каде престојуваат повеќе луѓе, особено да се избегнува близок контакт со луѓе кои се болни или сомнителни – кашлаат, киваат, имаат покачена телесна температура,
– често да се мијат рацете со вода и сапун или дезинфекционо средство,
– да се загреваат просториите за престој и често да се проветруваат,
– препорачливо е топло, слоевито облекување, топли бањи,
-да се пијат топли напитоци (чаеви и супи), овошни цедени сокови, вода со лимон,
-да се земаат свежи продукти богати со витамини и минерали, најдобро овошје и зеленчук кои му се неопходни на организмот.
Институтот за јавно здравје препорачува вакцинација на целото население, особено на лица кои припаѓаат на т.н. ризични групи. За сезоната 2025/2026, Министерството за здравство обезбеди бесплатна четиривалентна вакцина во вкупна количина од 80.000 дози, наменета за приоритетните групи население. Вакцинацијата започна на 16.10.2025 година и се спроведува во Центрите за јавно здравје (ЦЈЗ) со нивните Подрачни единици (ПЕ) и/или Здравствените домови. Дополнителни 2.400 дози комерцијални вакцини се набавени од страна на Центрите за јавно здравје, како вакцини за останатото население кое не спаѓа во горенаведените групи. Истите можат да се добијат за одреден финансиски надомест, а вакцинацијата се спроведува во Центрите за јавно здравје со нивните Подрачни единици. Според податоците од Управата за електронско здравство, со комерцијални вакцини севакцинирани вкупно 1.836 лица. Заклучно со четвртата недела, во Македонија, вакцинирани се вкупно 79.099 лица со бесплатна или комерцијална вакцина.
