Десет пријави за измами за огревно дрво од почетокот на годината регистрира кумановската полиција.
Последната измама беше пред неколку дена кога седумдесет и петгодишна кумановка пријави дека била измамена за 10.000 денари при купување на огревни дрва
-Начинот на измама сторителите го вршат со доаѓање во домот на постари лица, при што ги доведуваат во заблуда со лажно прикажување на факти дека продаваат огревни дрва, ги наведуваат да им ги платат дрвата под изговор дека камионот со дрва е во близина и дека дрвата ќе им бидат донесени, ги земаат парите и заминуваат, појаснува полицијата.
СВР Куманово, соопштува дека континуирано презема превентивни мерки и апелира до граѓаните да бидат претпазливи, особено повозрасните кога непознати лица им нудат огревни дрва за пониска цена од продажната, да не наседнуваат на измами во кои лажно се нудат услуги и сите сомнителни случаи да ги пријават на бројот 192.
