Средношколци од економското училиште „Перо Наков“ денеска ја посетија Телевизија Плус. Тие се запознаат со улогата на медиумите во едно општество, начинот на функционирање и предизвиците со кои се соочуваат новинарите секојдневно на терен.
Главниот уредник на телевизијата Драган Ивановски ги информираше на кој начин се создаваат вестите, новинарските стандарди и уредувачката политика. Зборуваа и за медиумската писменост, но и за лажните вести.
Учениците истакнаа дека се среќни што можат одблизу да се запознаат со функционирање на една локална телевизија.
-Во телевизијата дојдовме за да ги посетиме просториите и да видиме на кој и на каков начин работи медиумот-нагласи Теодора Спасовска, ученичка во СОУ Перо Наков.
-Дојдовме овде по повод Светскиот ден на медиумите за да видиме и дас е запознаме со работата на истите и да се информираме зошто е важна медиумската писменост. Всушност младите треба многу повеќе да бидат информирани и да знаат кои информирации да ги примат со резерва а кои со потполна доверба-дополни Николај Павловски, ученик.
Посетата е по повод Медиумски ден, кој го организира Високата школа за новинарство и односи со јавноста, во рамки на проектот Медиумска писменост во ера на наплив на информации, коалиција за медиумска писменост, кој се реализира во партнерство со весникот „Нова Македонија“ и Институтот за различности во медиумите, а со поддршка на Европската Унија. Идејата на овој настан е младите да се запознаат со улогата на медиумите во општеството, начинот на кој функционира една редакција, како и со основните новинарски професионални стандарди.
